प्रहरी कार्यालयकै कम्पाउन्डबाट दिउँसै मोटरसाइकल चोरी

कोहलपुर (बाँके) । इलाका प्रहरी कार्यालय कोहलपुर कै कम्पाउन्डबाट दिउँसै मोटरसाइकल चोरी भएको छ ।

प्रहरी कार्यालयमै काम विशेषले प्रवेश गरेका नेपालगञ्ज उपमहानगरपालिका १३ का सुरज यादवको मोटरसाइकल शुक्रबार दिउँसो चोरी भएको हो । यादव दिउँसो १२ बजेतिर कार्यालय पुगेका थिए । काम सकेर फर्किँदै गर्दा पार्किङमा राखिएको आफ्नै मोटरसाइकल हराएको उनले बताएका छन् ।

उनको भे ११ प ९६७८ नम्बरको बजाज कम्पनीको १५० सि.सि. क्षमताको कालो–रातो रंगको पल्सर मोटरसाइकल कार्यालय परिसरबाटै हराएको हो । यादवले इलाका प्रहरी कार्यालय कोहलपुरमा निवेदन दर्ता गरी सिसिटिभी फुटेज हेरेर खोजतलास गर्न आग्रह गरेका छन् ।
सामान्यतया सुरक्षाको दृष्टिकोणले सुरक्षित मानिने प्रहरी कार्यालय परिसरभित्रै मोटरसाइकल चोरी हुनु आपत्तिजनक घटना भएको स्थानीयले बताएका छन् । घटनाबारे इलाका प्रहरी कार्यालयले आवश्यक अनुसन्धान भइरहेको जनाएको छ ।