राप्ती सोनारीमा निर्माणाधीन ६४ मेट्रिक टन क्षमताको शीत भण्डार अनुगमन, बाँकी काम शीघ्र सम्पन्न गर्न निर्देशन

राप्ती सोनारी, बाँके ।
राप्ती सोनारी गाउँपालिका–४ मा आलु भण्डारण प्रयोजनका लागि निर्माणाधीन ६४ मेट्रिक टन क्षमताको शीत भण्डार (कोल्ड स्टोर) को प्रगति तथा बाँकी निर्माण कार्यको अनुगमन गरिएको छ।
गाउँपालिका अध्यक्ष तप्त बहादुर पौडेल, उपाध्यक्ष मनिषा सिंह चौधरी, वडा नं. ४ का वडाध्यक्ष गाउँपालिकाका प्रवक्ता तथा वडा नं. ८ का वडाध्यक्षसहितको टोलीले निर्माणस्थल पुगेर शीत भण्डारको स्थलगत निरीक्षण तथा अनुगमन गरेको हो।
अनुगमनका क्रममा टोलीले निर्माण कार्यको हालसम्मको प्रगति, गुणस्तर तथा बाँकी रहेका कामबारे जानकारी लिँदै समयमै निर्माण सम्पन्न गर्न सम्बन्धित पक्षलाई निर्देशन दिएको जनाएको छ।
स्थानीय कृषकहरूलाई आलु तथा अन्य कृषि उत्पादन सुरक्षित रूपमा भण्डारण गर्न सहज वातावरण सिर्जना गर्ने उद्देश्यले शीत भण्डार निर्माण गरिएको गाउँपालिकाले जनाएको छ। शीत भण्डार सञ्चालनमा आएपछि कृषकहरूले उत्पादन बिक्रीका लागि उचित समयसम्म भण्डारण गर्न सक्ने तथा कृषि उत्पादनको नोक्सानी कम हुने अपेक्षा गरिएको छ।
गाउँपालिका नेतृत्वले कृषि क्षेत्रलाई प्राथमिकतामा राख्दै किसानमैत्री पूर्वाधार निर्माणलाई तीव्रता दिइरहेको बताएको छ।