सडक सुरक्षाका लागि ट्राफिक सचेतना र्‍याली र दुर्घटना न्यूनिकरण अभ्यास सम्पन्न

सडक दुर्घटना न्यूनीकरण र ट्राफिक सचेतना अभिवृद्धि गर्ने उद्देश्यले नेपालगञ्जमा शुक्रबार ट्राफिक सचेतना र्‍याली र काल्पनिक सडक दुर्घटना न्यूनिकरण अभ्यास सम्पन्न भएको छ। सुरक्षित यात्रा नेपालको आयोजना र नेपाल राजमार्ग सुरक्षा तथा ट्राफिक व्यवस्थापन कार्यालय बुटवल र जिल्ला ट्राफिक प्रहरी कार्यालय बाँकेको सहकार्यमा कार्यक्रम सम्पन्न भएको हो।

नेपालगञ्ज उपमहानगरपालिकाको धम्बोझी चोकमा आयोजित कार्यक्रममा नगर प्रमुख प्रशान्त विष्ट, निमित्त प्रमुख जिल्ला अधिकारी खडानन्द खत्री, जिल्ला प्रहरी कार्यालय बाँकेका प्रमुख प्रहरी उपरीक्षक तुल बहादुर कार्की, लुम्बिनी प्रदेश ट्राफिक प्रहरी कार्यालय बुटवलका प्रमुख प्रहरी उपरीक्षक श्याम बहादुर खत्री, स्थानीय जनप्रतिनिधि, विभिन्न विद्यालयका शिक्षक, विद्यार्थी, महिला संघका प्रतिनिधि र सञ्चारकर्मीहरुको उपस्थिति रहेको थियो।
बिपी चोकदेखि धम्बोझी चोकसम्म सडक दुर्घटना न्यूनीकरण र सडक सुरक्षा अभिवृद्धि गर्ने उद्देश्यले ट्राफिक सचेतना र्‍याली आयोजना गरिएको थियो। र्‍यालीपछि धम्बोझी चोकमा काल्पनिक सडक दुर्घटना न्यूनिकरण अभ्यास गरिएको थियो।
कार्यक्रममा सहभागी वक्ताहरुले सडक सुरक्षाका लागि ट्राफिक नियमको पालना गर्नुपर्ने र चालक तथा पैदलयात्री सबै सचेत हुनुपर्नेमा जोड दिएका थिए। सडक दुर्घटना न्यूनीकरणका लागि यस्ता सचेतनामूलक कार्यक्रमहरु प्रभावकारी हुने उनीहरुको भनाइ थियो।

Advertisement