फाइनलअघि खेलाडीलाई जङ्गल सफारी, मुख्यमन्त्री कोहलपुर गोल्डकपको अनौठो आयोजना

मुख्यमन्त्री कोहलपुर गोल्डकप २०८० को फाइनल खेलअघि आयोजकले खेलाडीहरूलाई बाँके राष्ट्रिय निकुञ्जमा जङ्गल सफारी गराएको छ। फागुन २४ गते हुने फाइनल खेलमा राइजिङ स्टार फुटबल क्लब, नवलपरासी र आयोजक कोहलपुर रेसिङ साहारा फुटबल क्लब, बाँके प्रतिस्पर्धा गर्दैछन्।

फाइनलअघि खेलाडीहरूलाई एक दिनको विश्राम दिँदै आयोजकले निकुञ्जमा सफारी गराएको हो। कोहलपुर रेसिङ साहारा फुटबल क्लबका अध्यक्ष चक्र चिमाला क्षेत्रीका अनुसार, एक विदेशी खेलाडीसहित १८ जनाले सफारी गरेका थिए। खेलाडीहरूलाई विश्रामका साथै स्थानीय पर्यटन प्रवर्द्धन गर्ने उद्देश्यले निकुञ्ज भ्रमण गराइएको उनले बताए।

खड्गवार हातिसारबाट सुरु भएको सफारीमा खेलाडीहरूले चितल, निलगाई, बदेल र चौका देखेका थिए। राइजिङ स्टार फुटबल क्लब, नवलपरासीका खेलाडीहरूले प्राकृतिक वातावरणमा समय बिताउँदा नयाँ ऊर्जा प्राप्त भएको बताए। कोहलपुर रेसिङ साहारा फुटबल क्लबका संयोजक कर्ण थापाले निकुञ्ज प्रवर्द्धन गर्ने लक्ष्यसहित यो सफारी आयोजना गरिएको बताए। “खेलाडीहरूलाई प्राकृतिक सौन्दर्यको अनुभव गराउनुका साथै बाँके राष्ट्रिय निकुञ्जको प्रचार गर्ने उद्देश्यले यो कार्यक्रम गरिएको हो,” उनले भने।
मुख्यमन्त्री कोहलपुर गोल्डकपको फाइनल खेल फागुन २४ गते हुनेछ। प्रतियोगिताको उपाधि भिडन्तमा यी दुई उत्कृष्ट टिम आमनेसामने हुनेछन्।