सुगम बन्दै गएको राप्ती सोनारी

प्राकृति श्रोत साधनले भरिपुर्ण रहेको जिल्लाकै एकमात्र पालिका राप्ती सोनारी गाउँपालिका भुगोलको हिसाबले कुनैसमय पिछडिएको क्षेत्रको रुपमा जिल्लामा चिनिने गर्थ्यो । तर समय र बिकास योजनाहरु धमाधम सुरु हुदा यतिबेला भने राप्ती सोनारीले आफ्नो परिचय नै फेरेको छ ।
हुलाकी सडक र राप्ती नदीमा पुल निर्माण भएपछि बाँकेको राप्ती सोनारी गाउँपालिकाको सोनारीक्षेत्र सुगम बन्दै गएको छ । कचनापुर र बिनौनालाई जोड्ने राप्ती पुल सँगसँगै हुलाकी सडक निर्माण भएपछि विगतमा दुर्गम क्षेत्रको रूपमा रहेको राप्ती नदी पारी अवस्थित बैजापुर, बिनौना र फत्तेपुर अहिले सुगम बनेका हुन् । राप्ती सोनारी गाउँपालिकाको व्यावसायिक चहलपहल बढ्दै गएको राप्ती सोनारी गाउँपालिका–३ का वडाध्यक्ष मीनकुमार चौधरीले बताए।हुलाकी सडक र पुल बनेपछि सोनारी क्षेत्रका जनताले विकासको अनुभूति गर्न पाएका छन्, व्यावसायिक कारोबार पनि बढ्दै गएको छ’, उनले भने, ‘हुलाकी सडक बनेपछि मानिसको आवागमन र चहलपहल बढ्दै गएको छ, अहिले घरेलु तथा साना उद्योग तथा व्यवसाय पनि फस्टाउँदै गएका छन्।’
सडक र पुल बनेपछि राप्तीपारी अवस्थित बिनौना, बैजापुरमा रहेका धार्मिक तथा पर्यटकीय क्षेत्र घुम्न आउने आन्तरिक पर्यटकको चहलपहल बढेको छ । बैजापुरमा रहेको प्रसिद्ध भुवरभवानी मन्दिर, बाबा बर्फानी र बिनौनामा रहेको धुमैया उद्यान र नवनिर्मित राप्ती पुलमा घुम्ने सर्वसाधारणको संख्या बढ्दो छ।
हुलाकी सडक र राप्ती नदीमा माथि बनेको पुललगायतका पूर्वाधार विकासले सोनारी क्षेत्रका जनताको आर्थिक तथा समग्र सामाजिक जीवनस्तरमा सकारात्मक प्रभाव पारेको राप्ती सोनारी–५, बिनौनास्थित भुवरभवानी माध्यमिक विद्यालयका प्राचार्य चेतबहादुर विष्टले बताए।
नेपालगञ्ज–बघौडा हुलाकी सडक सँगसँगै राप्ती सोनारीको वडा नम्बर ६ कुण्डादेखि नारायणपुर हुँदै अगैयास्थित पूर्व–पश्चिम राजमार्ग जोड्ने हुलाकी सडकखण्ड विस्तार भएपछि अहिले साना ठूला सवारीसाधन आवागमन पनि बढ्दै गएको छ। नेपालगञ्जबाट कोहलपुर हुँदै अगैया पुग्ने मुख्य राजमार्ग भन्दा यो हुलाकी सडक छोटो पर्ने भएकाले सवारीसाधनको आवागमन बढ्दो रहेको विष्टले बताए।
कचनापुर र बिनौनालाई जोड्ने राप्ती पुल निर्माण भएपछि गाउँपालिकाको नदी वारि र पारिको सिधा सम्पर्क बनेको राप्ती सोनारी–५ का जमानसिंह वलीले बताए।
सडक र पुललगायतका पूर्वाधार विकाससँगै राप्ती सोनारीमा व्यवसायी चहलपहल आएको उल्लेख गर्दै उनले कृषिको माध्यमबाट जनताको आर्थिक जीवनस्तर उकास्नतर्फ अब स्थानीय सरकारले योजना ल्याउनुपर्ने बताए।
यी त थिए पुर्वाधार बिकासले गर्दा राप्ती सोनारीलाई सिगम बनाएको कथा तर राप्ती सोनारी त्यतिकैमा सिमित भने छैन । शिक्षा, स्वास्थ्य, कृषी र सामाजिक बिकासको काममा समेत राप्ती सोनारी पछिल्ला बर्षहरुमा अब्बल बन्दै गएको छ ।
प्राकृति श्रोत साधनले भरिपुर्ण रहेको जिल्लाकै एकमात्र पालिका राप्ती सोनारीले आफुलाई पुर्वाधार बिकास संगै अन्य क्षेत्रहरुमा पनि आफुलाई अब्बल बनाउदै गएको छ ।
जनप्रतिनिधिको बिकास प्रतिको एकेबद्द्ता र दृढ इच्छाशक्तिको कारण राप्ती सोनारी यतिबेला बिकासको लयमा अग्रस्थानमा छ ।