सगरमाथा स्कुलले फेरि एकपटक प्रमाणित गरिदिएको छ – उत्कृष्टता केवल लक्ष्य होइन, अभ्यास हो

कोहलपुर , — शिक्षा क्षेत्रको गौरव र अनुकरणीय उदाहरणका रूपमा उभिएको सगरमाथा इङ्लिस बोर्डिङ सेकेन्डरी स्कुल, कारकाँदो, नेपालगन्ज–१८ ले यस वर्ष पनि एसईई परीक्षामा सतप्रतिशत नतिजा प्राप्त गर्दै आफ्नो शैक्षिक इतिहासमा अर्को सफल अध्याय थपेको छ।

शैक्षिक सत्र २०८१ मा विद्यालयबाट SEE परीक्षामा सहभागी भएका सम्पूर्ण ४४ जना विद्यार्थीहरू उत्कृष्ट नतिजासहित सफल भएका छन्। गत वर्षको सफलतालाई दोहोर्याउँदै, विद्यालयले लगातार १३ औँ वर्ष १०० प्रतिशत पासदर कायम राख्न सफल भएको हो।

विद्यालयका प्रबन्ध निर्देशक (एमडी) कौशल पाण्डेयका अनुसार, विद्यालयले शैक्षिक गुणस्तर, सशक्त अनुशासन, अनुभवी तथा समर्पित शिक्षक टिम, र नवीन शिक्षण पद्धतिलाई आधार बनाउँदै विद्यार्थीहरूलाई समर्पित शैक्षिक वातावरण प्रदान गर्दै आएको छ।
यसै नीतिको परिणामस्वरूप विद्यालयले निरन्तर उल्लेखनीय सफलता हासिल गर्दै आएको छ।

सगरमाथा इङ्लिस बोर्डिङ सेकेन्डरी स्कुल का संस्थापक कृष्ण जिसी का अनुसार
“हामीले विद्यार्थीलाई केवल परीक्षा पास गराउने मात्र हैन, उनीहरूको समग्र व्यक्तित्व विकासमा केन्द्रित शिक्षा दिन प्रयास गरिरहेका छौँ। शिक्षक, अभिभावक र विद्यार्थीहरूबीचको सहकार्य र विश्वासको नतिजा नै आजको यो उपलब्धि हो।”

विद्यालय प्रशासनले यस अवसरमा सफल विद्यार्थीहरूलाई बधाई दिँदै, शिक्षण-शिक्षण क्रियाकलापमा प्रत्यक्ष वा अप्रत्यक्ष रूपमा योगदान पुर्‍याउने सम्पूर्ण शिक्षक, कर्मचारी, अभिभावक तथा सरोकारवालाहरूलाई आभार प्रकट गरेको छ। विद्यालयको भनाइमा, यस्ता सफलताले भावी पुस्तालाई अझै प्रेरणा प्रदान गर्ने विश्वास गरिएको छ।

सगरमाथा स्कुल विगतदेखि नै गुणस्तरीय शिक्षाको लागि परिचित रहँदै आएको छ। पठनपाठनका क्रममा टेक्नोलोजीमैत्री कक्षा, नियमित मूल्याङ्कन प्रणाली, अतिरिक्त क्रियाकलापमा सहभागिता र विद्यार्थीकेन्द्रित शैक्षिक वातावरणले गर्दा विद्यार्थीहरूको सिकाइ प्रक्रिया अझ प्रभावकारी भएको छ।

विद्यालयले विद्यार्थीहरूको उज्ज्वल भविष्यको सुनिश्चितताका लागि एसईई पश्चातको शैक्षिक यात्रा पनि व्यवस्थित गर्न सुरु गरेको छ। सोही क्रममा, विद्यालय अन्तर्गत सञ्चालित सगरमाथा कलेजमा विद्यार्थीहरूलाई अगामी शैक्षिक स्तरमा समेत अध्ययनको अवसर प्रदान गरिने जनाएको छ।

विद्यालय प्रशासनको भनाइमा, “गुणस्तरको शिक्षाको खोजीमा रहेका अभिभावक र विद्यार्थीहरूको पहिलो रोजाइ सगरमाथा बन्नेछ भन्ने हामीलाई विश्वास छ। शिक्षालाई सेवा र उत्तरदायित्वको रूपमा लिएको हाम्रो दृष्टिकोणले नै यो सम्भव भएको हो।”

१३ वर्ष लगातार शतप्रतिशत नतिजा ल्याउने स्कुलको यो सफलताको कथा केवल एक संस्थाको उपलब्धि मात्र नभई, समर्पित शिक्षण शैली, योजनाबद्ध शैक्षिक रणनीति र विद्यार्थीप्रतिको गहिरो लगावको प्रतिविम्ब हो।