३१ वर्षे शिक्षण यात्रा टुंग्याउँदै सेतीराम गोसाईको भव्य विदाई

✍️ टार्जन वली
शिक्षक जानुहुन्छ, तर उहाँको शिक्षाले हजारौंको मनमा उज्यालो बालिरहन्छ।

राप्ती सोनारी गाउँपालिका–३ मा अवस्थित श्री सरस्वती माध्यमिक विद्यालयका सम्माननीय शिक्षक सेतीराम गोसाईलाई ३१ वर्षे गौरवपूर्ण शैक्षिक यात्रापछि एक भव्य विदाई कार्यक्रमका साथ बिदा दिइएको छ। मंगलवार विद्यालय परिसरमा आयोजित कार्यक्रममा उहाँलाई श्रद्धा, सम्मान र आँशुले भिजेको विदाई दिइएको हो।

सेतीराम गोसाई, जसले आफ्नो जीवनको एक चौथाइभन्दा बढी समय शिक्षण पेशामा समर्पित गर्नुभयो, अवकाशको चरणमा पुग्दा न केवल विद्यार्थी, शिक्षक वा अभिभावक, बरु पूरै समुदाय भावुक बन्यो। उहाँको कर्तव्यपरायणता, नियमितता, अनुशासन र गहिरो शिक्षण शैलीका कारण उहाँ विद्यालयका आधारशिला समान हुनुहुन्थ्यो।

कार्यक्रममा राप्ती सोनारी गाउँपालिकाका शिक्षक-शिक्षिका, अभिभावक, विद्यार्थी, राजनीतिक दलका प्रतिनिधि तथा विभिन्न निकायका कर्मचारीहरू सहभागी थिए।

विद्यालयमा उत्सवजस्तै माहोल भए तापनि कार्यक्रम एकदमै भावनात्मक र गहिरो थियो।
कार्यक्रममा बोल्दै प्रधानाध्यापक ललितकुमार चौधरीले भने, “गोसाई सर मेरो शिक्षक मात्र होइन, अभिभावकझैँ हुनुहुन्थ्यो। आज उहाँलाई बिदा गर्नु एकदमै गाह्रो क्षण हो। हामी उहाँबाट सिकेका मूल्य र शिक्षाले विद्यालयको भविष्य निर्माणमा मार्गदर्शन गरिरहनेछ।”

त्यस्तै वडा नं. ३ का वडाध्यक्ष मिनकुमार चौधरीले सेतीराम गोसाईको योगदानलाई स्मरण गर्दै भने, “हाम्रो वडामा यस्ता समर्पित शिक्षक हुनु गर्वको विषय हो। उहाँको योगदान शब्दमा मात्र होइन, कर्मले बयान हुन्छ।”

गोसाई सरले ११ कक्षासम्मका विद्यार्थीहरूलाई पढाउँदै आउनुभएको थियो। उहाँले लेखा, अङ्ग्रेजी र जीवनोपयोगी शिक्षामा विशेष दक्षता राख्नुहुन्थ्यो। सरल, विनम्र र अनुशासित स्वभाव भएका गोसाई सरको पढाउने शैली प्रभावशाली मात्र थिएन, उहाँका शब्दहरूले विद्यार्थीहरूको जीवन नै परिवर्तन गर्न सक्ने खालका हुन्थे।

विदाई कार्यक्रममा आफ्ना अनुभूति पोख्दै गोसाई सरले भने, “शिक्षक बन्नु मेरो सपना थियो, र आज त्यो सपना ३१ वर्षको यात्रापछि पुरा भएको महसुस गर्दैछु। विद्यालय र यहाँका सबै विद्यार्थी, सहकर्मी र अभिभावकहरू मेरो जीवनको अमूल्य सम्पत्ति हुन्।”

कार्यक्रममा उहाँलाई प्रशंसापत्र, माला, अबिर र उपहारसहित सम्मान गरिएको थियो। गाउँपालिका तथा वडास्तरका जनप्रतिनिधिले पनि उहाँको समर्पणप्रति आभार व्यक्त गरेका थिए।

विद्यालय परिवार, विद्यार्थी तथा समग्र समुदायबाट दिइएको यस्तो सम्मान कुनै व्यक्तिको सेवानिवृत्तिको अन्त्य मात्र नभई एउटा युगको समापनको प्रतीक हो। सेतीराम गोसाईले छाडेको शिक्षणको पदचिन्ह आगामी पुस्ताका लागि प्रेरणाको स्रोत बन्ने निश्चित छ।